مين ...دة اااللى جرحك وجة عليك

والله يا سمسمة أنا أحييكى على الموضوع ده لأنه جاى على الجرح تمام

أنا بصراحة مش عارف أبتدى منين و إزاى . لكن لازم أفضفض علشان ماتحصليش حاجة أكتر من اللى أنا فيه

الموضوع بإختصار يا سمسمة إنى حاسس بظلم شديد جداً من كل الناس اللى حواليا و ده ببساطة لأنى بمر بظروف مرضية صعبة شويتين و ده فى حد ذاته مش بيمثل ليا أى مشكلة

بل بالعكس الحمد لله أنا راضى تماماً بما كتبه الله لى و أنا عارف إن إفتكار ربنا رحمه

والله العظيم أنا مش بقول كده و خلاص ربنا اللى عالم إنى فعلاً عايش حياتى فى منتهى السعادة و الحمد لله

لكن المشكلة الحقيقية هى نظرة الناس الظالمة جداً لمن هو فى ظروفى . فأنا أعانى من مرض الفشل الكلوى منذ حوالى 8 سنوات . و لكنى فضل من الله أمارس حياتى بصورة طبيعية جداً و بشتغل بدل الشغله شغلتين و مقبل على الحياة بطريقة محدش يتخيلها . و هى دى بقى المشكلة . إن كل الناس بتسكتر على الواحد إنه يمارس حياته و يعيش بصورة طبيعية . فالناس بتنظر للواحد إنه لازم يبقى طريح الفراش يصارع المرض و يفضل مستنى لغاية ما السر الإلهى ما يطلع

يعنى لاأشتغل بقى و لا أخرج و لا أروح و لا أجى و لا أعييش حياتى زى أى شاب فى سنى ما بيعشها . و طبعاً طبعاً مش من حقى على الإطلاق إنى أفكر فى موضوع الجواز .

يا خبر! جواز مرة واحدة . إنتا إتجننت واللا إيه يا درش

إذا كان الناس مستكترين عليك نعمة الحياة أصلاً . تقوم إنتى تقول جواز مرة واحدة .

و مهما حاولت أفهم الناس إنى إنسان طبيعى و الحمدلله لسه بصحتى و أستطيع أن أواصل مشوار الحياة . ألاقى نفسى واقف أمام حيطة سد

والله العظيم أنا المجهود اللى ببذله خلال يومى العادى ما فى أى إنسان طبيعى أو سليم إنه يقدر يعمله

فأنا أعمل مدير حسابات فى إحدى الشركات و بيبقى عندى 3 أيام فى الإسبوع بعمل فيهم جلسات غسيل الكلى . و المسافة بين بيتى و بين شغلى تعتبر سفر ( من بولاق الدكرور لمصر الجديدة )
و أرجع على الساعة 2 على ميدان لبنان على المستشفى لغاية الساعة 8 بالليل و بعدين مش أروح أنام . لأ أفضل مكمل يومى مع الأصحاب أو الجيران لغاية أخر الليل و اليوم اللى مش عندى فيه مستشفى بخلص الشغل بتاعى على الساعة 6 و أروح على الشغل التانى اللى بردو فى مصر الجديدة و بردو بنفس الوظيفة كمدير حسابات و لكن بارت تايم
بذمتكم فى إنسان مريض بمثل هذا المرض اللعين يقدر إنه يبذل المجهود ده كله

صدقونى هى دى الحقيقة . و أنا مش عارف العيب فين

يا ترى أنا اللى مزودها شويتين و مش حاسس إنى راجل مريض

واللا الناس هى اللى المفروض تغير من نظرتها ليا و تتعامل معايا على إنى إنسان طبيعى زى أى إنسان عادى

و يا ترى هل من حقى إنى أعيش و أتجوز و أكون بيت و أسرة و أحس بالإستقرار

واللا أستسلم للأمر الواقع و بلاش أحلم و أعيش فى الخيال و خلينى عايش على أرض الواقع المفروض عليا

معلش أنا طولت عليكم لكن بجد بجد أنا فى أزمة حقيقية و مش لاقى ليها أى حل

شكراً يا سمسمة على ردك الجميل ومتابعتك و إهتمامك بالموضوع

و ربنا يجازيكى كل خير على شوية الدعوات اللى دعيتيهم ليا و ربنا يتقبل منك

و أحب أطمنك إنى أه الموضوع ده مخلينى واخد على خاطرى شويتين لكن عمرى فى حياتى ما هاتأثر بالكلام ده.

اللى خلانى قدرت و إتغلبت على المرض نفسه و إتصاحبت عليه و بقيت متعود عليه زى الأكل و الشرب كده . يبقى كلام الناس هو اللى هيأثر فيا

هههههههههههههههه . ماتخافيش يا قمر

الحمد لله

أنا أجمد من كده بكتير . بس حبيت أفضفض معاكم شوية لأن الكلام بيخفف عن الواحد شوية .

شكراً يا قمر على موضوعك الرائع و اللى أتمنى بعد الكلام بتاعى إن كل الناس تدخل و تشارك بجد

أظن مافيش صراحة أكتر من اللى أنا إبتديت بيها .

و إنتى من أهل الخير يا سمسمة و أكيد القسم فى منتهى الجمال

و إنشاء الله هيكون أحسن و أحسن لما باقى الأعضاءيشوفوا الكلام الجديد ده و يتفاعلوا معاه يا قمر

شكراً ليكى يا سما و ربنا يجازيكى كل خير على الكلام الجميل بتاعك

و أكيد طبعاً أنا بأحاول على قد ما بأقدر إنى أعمل بكلامك ده و ربنا اللى عالم

انا بقى بقت مشكلتى مشكله من بعد انى حبيت شخص و وثقت فيه ثقه عمياء لقيته للاسف بيقولى سورى اصل انا اساسا كنت مرتبط و حبيت واحده و كنت بحاول انسى لكن اللى قولتهوله هى كلمه واحده بس حسبى الله و نعم الوكيل لان بسببه رفضت ابن عمى و اتسبب بعد كده مشاكل بين بابا و عمى و كل ده بسبب الحب الازرق ده و للاسف مش قادره انسى الحب ده و لا حتى ادخل اى مغامره تانيه لان لو دخلت اخاف على الشخص التانى لان زى ما اتعمل فيا ممكن يتعمل فيه من غير ما اقصد و كمان قررت بينى و بين نفسى انى اتجوز جواز تقليدى و انى استمر على هذا النهج . بس ده كل اللى عندى .

مرسى يا اريج على ردك العسول ده